Hanı dediyim bəy ərənlər,
Dünya mənim deyənlər!
Əcəl aldı, yer gizlədi
Fani dunya kimə qaldı?

Dədə Qorqud

Azərbaycan türklərinin mifologiya və folklor aləminə xoş gəlmisiniz!

Müasir dünyanın informasiya aləmində Yer kürəsinin çoxsaylı xalqları çalışırlar ki, ulu əcdadlarından yadigar qalanlar, əsrlər boyu təcrübə yolu ilə əldə edilənlər, xüsusilə mədəni-ədəbi sərvətlər itib-batmasın və bəşər övladının gələcək nəsillərinə dolğun şəkildə çatdırılsın. Gənc müstəqil respublikamız bütün beynəlxalq qrumlarda təmsil olunur, dünyanın mədəni ölkələri ilə əlaqələr qurur, Yer kürrəsində baş verən qlobal proseslərdən kənarda qalmır. Məhz bu layihənin də əsas məqsədi Azərbaycan xalqının mənəvi mədəniyyəti, xüsusilə ilkin dünyagörüşü – mifologiyası, mərasimləri, adət-ənənələri, folkloru, yazılı abidələri, dili və dövlətçilik tarixi haqqında həqiqətləri dünyaya yaymaqdır. Miflərin və folklor materiallarının əksəriyyəti ilk dəfə ictimaiyyətin diqqətinə çatdırılır. Eləcə də represiya illərində yazıya alınmış 40-a yaxın klassik aşığın şerləri və dastanlarının mətni arxivlərdən tapılaraq sizlərə təqdim olunur. «Azmif.net» saytı ayrı-ayrı tarixi mərhələləri əks etdirən bir neçə böyük bölmədən ibarətdir və qədim Azərbaycan türklərinin mənəvi aləminə səhayətə çıxmaq istəyənlərə bələdçilik edəcək. İnanırıq ki, bizə qoşulanlar yorulmayacaqlar, ulu bir soyun yaradıcılıq emalatxanasından çıxan bədii söz inciləri, bir-birindən seçilən obrazlar, əhvalatlar, maraqlı təsvirlərlə rastlaşacaq, bir çox gizli sirlərin açarını tapacaq və ulu ərənlərimizin müdrikliyi, humanistliyi, işgüzarlığı, sənətsevərliyi, istedadı qarşısında heyran qalacaqlar…