Mən Ramazan Oruc oğlu Qafarlı 1951-ci ilin iyun ayının 17-də Azərbaycanın qədim və özünəməxsus şəhəri Şəkidə anadan olmuşam. Şərqin (Qafqazda yerləşən) ən qədim yaşayış məskəni Şəki əslində «saki» // «saklar» deməkdir. Əski çağlarda tarixi mənbələrdə «Sakasen» şəklində xatırlanmışdır və prototürklərin ilkin yurd yerlərindən biri hesab edilir.

Bu günə qədər Azərbaycan Dövlət Pedaqoji İnstitunun diplomunu (filologiya ixtisası üzrə) almış, «Azərbaycan uşaq folkloru» movzusunda namizədlik dissertasiyası müdafiə etmiş (1988), keçmiş SSRİ-nin AAK-nın Böyük elmi işçi attestatına layiq görülmüşəm. Elmi fəaliyyətimlə bağlı 2002-ci ildə Rusiyanın Sankt-Peterburq şəhərində üç aylıq stajirovka keçmiş, A.Gertsen adına Rusiya Dövlət Pedaqoji Universitetinin Elmi Şurasında «Azərbaycan türklərinin mifologiyası» adlı doktorluq dissertasiyası mövzusunu təsdiqlətmiş, işi başa çatdırıb müzakirəyə təqdim etmişəm.

Hal-hazırda ADPU-nun Folklor və qədim ədəbiyyat kafedrasının dosenti vəzifəsində çalışır, MEA-nın Folklor, Ədəbiyyat, Fəlsəfə və Hüquq institutları ilə sıx əməkdaşlıq edirəm. 1999-cu ildə «Ərən» adlı elmi-ictimai qəzet təsis etmişəm. Həmin qəzetin baş redaktoruyam.

Türk xalqlarının qədim tarixə malik müxtəlif ritualları, bayram və ayinləri, folkloru, yazılı abidələri, ilkin dünyagörüşü, mifləri, tanrılar, mədəni qəhrəmanlar haqqında özünəməxsus təsəvvürləri məni heyrətləndirir. Ona görə də həyatımın yetkinlik çağlarından başlayaraq xalqımızın mifoloji görüşlərini, qədim tarixini, mədəniyyətini, ədəbiyyatını, etnoqrafiyasını və folklorunu öyrənməklə məşğulam. Bu günədək Azərbaycanda və respublikamızın sərhədlərindən kənarda mifologiya, folklor və yazılı abidələr barədə beş monoqrafiya, üç toplu, yüzdən çox elmi məqalə çap etdirmiş, bir çox Beynəlxalq elmi konfrans və simpoziumlarda məruzələr oxumuşam. Son dəfə Sankt-Peterburq şəhərində keçirilən V «Etnosun gerçəkliyi» (22-25 mart 2003) konfransındakı məruzəmin mətni akademik Q.Bordovskinin redaktorluq etdiyi məcmuədə işıq üzü görmüşdür.

Bu saytı Azərbaycan türklərinin tarixi kökləri, adət-ənənələri, dünyagörüşü ilə maraqlananlara həsr edirəm. Qaldırdığım məsələlərdə qaranlıq qalan, anlaşılmayan qənaətlər barədə sorğunuzu author@azmif.net, ramazan@azmif.net, gafarli@mail.az, və ya ramazan@baku.az göndərməyi unutmayın. Sayt haqqında fikirləriniz mənim üçün çox gərəklidir. Qonaq istədiyiniz vaxt kitabına daxil olun, ürəyinizdən keçənləri, arzu və təkliflərinizi yazmaqla saytır yaradıcılarını məmnun edin. Sizin elektron poçt vasitəsi ilə əlaqə yaratmaq imkanınız da var. Saytla tanış olanlara qabaqcadan minnətdaram. Ümidvaram ki, qədim Azəbaycan türklərinin rəngarəng mifləri və folklorundan ibarət xəzinənin qapısını açıb içəri keçənlər uduzmayacaqlar, oradan əliboş deyil, əvəzsiz sərvətlə geri qayıdacaqlar.

Saytın yaradılmasında mənə köməklik edən hər kəsə, xüsüsilə Rauf Əliyevə (vebmaster), Rəşad Qafarova (vebdizayner) və Anar İsmayılova (host-master) təşəkkürümü bildirirəm.